Steinn – útgáfa ehf var stofnsett sem verktakafyrirtæki í skrúðgarðyrkju árið 1989 og hét þá Garðyrkjumeistarinn ehf. Áherslur í rekstrinum hafa breyst og byggir stafsemin nú á bókaútgáfu, fyrirlestrum og garðaráðgjöf. Fyrirtækið sinnir þó enn garðaumhirðu fyrir fáeina viðskiptavini.
Garðyrkjuráðgjöf í heimagörðum er í boði, ásamt sýnikennslu í trjáklippingum fyrir einstaklinga, hópa, s.s. saumaklúbba, starfsmannafélög og fyrirtæki.
Húsfélögum býðst aðstoð við gerð útboðslýsinga og gerð kostnaðaráætlana vegna garðaumhirðu og val á verktökum.
Garðyrkjumeistarinn ehf. annaðist m.a. endurgerð kirkjugarðs Hóladómkirkju í Hjaltadal, þar með talið steinhleðslur og steinlagnir umhverfis kirkjuna. Steinn Kárason garðyrkjumeistari hefur stýrt fyrirtækinu frá upphafi.
Myndband um söfnun,verkun og sáningu birkifræs til endurheimtunar landgæða er nú aðgengilegt á netinu. Umhverfisfræðingurinn, garðyrkjumeistarinn og náttúruunnandinn Steinn Kárason hafði umsjón með gerð myndbandsins, samdi handrit og tónlist, en AXA ehf sá umframleiðsluna.
Um tilurð myndbandsins segir Steinn að hann hafi haft dálæti á íslenska birkinu frá blautu barnsbeini og vilji veg þess sem mestan, enda birkið ein af undirstöðum byggðar í landinu um aldir.
„Þetta er einskonar framhald á vinnu minni við endurheimt Brimnesskóga í Skagafirði og kynbótum á Geirmundarhólabirkinu. Ég er í stjórn félags Skógarskáta og hef verið í vinnuhópi skáta um „græn fótspor skáta“ og skátar vilja láta gott af sér leiða. Skógarskátar hafa að safnað birkifræi og sáð því til uppgræðslu við Úlfljótsvatn og víðar og einhvern fróðleik vantaði. Þess vegna bar ég á þeim vettvangi fram hugmyndina um gerð myndbandsins við ágætar undirtektir. Steingrímur Erlendsson hjá AXA tók vel í hugmyndina og þetta myndband er afraksturinn“.
Með myndbandinu hefur fólk haldgóðar leiðbeiningar um hvernig hægt er að skila náttúrunni aftur því sem frá henni var tekið og njóta jafnframt útivistar í íslenskri náttúru.